ព្រះសីហនុ៖ សមត្ថកិច្ចឃាត់ខ្លួនជនជាតិចិនម្នាក់ ក្រោយចុះពិនិត្យឃើញគ្រឿងញៀនមួយចំនួនក្នុងឡានកាលពីយប់ថ្ងៃទី៤ ខែមីនា ឆ្នាំ២០២២ ក្នុងក្រុងព្រះសីហនុ។

កម្លាំងគណៈបញ្ជាការឯកភាពក្រុងចុះត្រួតពិនិត្យឆែកឆេររកមើលអាវុធជាតិផ្ទុះ និងបទល្មើសផ្សេងៗទៀត នៅតាមបណ្ដោយផ្លូវវិថី២ធ្នូ ត្រង់ចំណុចទល់មុខសណ្ឋាគារហៃណាធាន ស្ថិតក្នុងភូមិ១ សង្កាត់៣ ក្រុងព្រះសីហនុ ខេត្តព្រះសីហនុ កាលពីយប់ថ្ងៃទី៤ ខែមីនា ឆ្នាំ២០២២ បានឃាត់ចាប់បានជនជាតិចិនម្នាក់ បើកឡានម៉ាក lexus gs ៣០០ ពាក់ស្លាកលេខភ្នំពេញ 2AK-300 ពណ៌ស មានផ្ទុកនៅសារជាតិញៀនចំនួន ៤ កញ្ចប់។

ក្រោយឃាត់ខ្លួនបុរសបើកបររថយន្តខាងលើបញ្ជូនទៅស្នងការនគរបាលខេត្តព្រះសីហនុ ដើម្បីបន្តតាមនិតិវិធី។

សមត្ថកិច្ចក៏បានឲ្យដឹងផងដែរថា ក្រៅពីចាប់បានគ្រឿងញៀននិងជនជាតិចិនខាងលើ សមត្ថកិច្ចបានឆែកឆេរយានយន្តចំនួន ២០៦គ្រឿង ម៉ូតូកង់បី (PassApp) ចំនួន ២គ្រឿងផងដែរ។ ដកហូតបានដំបងដែកចំនួន ៣ដើម និងបានពិនិត្យមើលអាវុធជាតិផ្ទុះចំនួន ៤ ដើមមានឯកសារសំបុត្រប៉េត្រឹមត្រូវ៕